Bdan lecɣal seg tlemmast n tɣiwant ɣer taddart n Lbir

Tebda, deg taggara n ddurt iɛeddan, tduti n ubrid aɣiwan i iccuden talemmast n tɣiwant n Mɛatqa ɣer tudrin n At Aḥmed, At Zɛim, Iɣil Izeggaɣen,Tajeddiwt, Tizi Tzeggart, Taxribt, Iɣil Aɛwen d Lbir. D takebbanit n SONSTRO i d-yelhan s tduli n yiberdan imeqqranen i yeṭṭfen asenfar-agi agejdan. Asenfar i ttraǧun yimezdan acḥal d aseggas tura. Tebda-d tkebbanit taduli n ubrid seg taddart n Lbir i d-iḥudden taɣiwant n Mɛatqa akked tɣiwant n Iẓerruden.

Dɣa mbaɛd beddu n tduli n ubrid-agi, yebgen-d uselway n Useqqamu aɣerfan aɣiwan n Mɛatqa, Mass Lyes Laguel, lferḥ-is,u yesseḥres ɣef tkebbanit akken ad texdem taduli akken iwata lḥal. Ad d-nesmekti kan d akken aselway n Useqqamu aɣerfan aɣiwan, yerwa tazliwin akken ad yessiweḍ ad d-yawi asenfar-agi. Dɣa deg waggur n duǧembeṛ iɛeddan, yettwakkes-as usenfar-agi, lamaɛna beddent teseqquma n tudrin n tɣiwant ɣer yidis-is, dɣa smarsent lḥers meqqren ɣef lwali n Tizi-Uzzu, anda i d-yerra asenfar-agi n tduli i tɣiwant n Mɛatqa.

Asali n beddu n tduli n ubrid-agi, yessefreḥ nezzah imsebriden, ladɣa imasnayen n yimsiklen i yerkeb lɣiḍ meqqren, seg yir addad n ubrid-agi. Ɣef wanect-agi dɣa i xedmen, yakan, imasnayen asendad n wugar n ddurt deg waggur n unbir iɛeddan, akken ad d-beggnen lxiḍ-nsent s yir liḥala n ubrid anda sawaḍen imsiklen.

Suddessen-d Srabes n Tfellaḥt yiwen n wass n usileɣ

Deg wass n, amhad iɛeddan 30 deg yennayer, i d-suddsen Srabes n tfellaḥt n Mɛatqa yiwen n wass n usileɣ d tummla n tarrayin yemgaraden n ufras n uzemmur i lfayda n yifellaḥen n tɣiwant n Mɛatqa akked tɣiwanin yettabaɛen ɣer srabes-agi, ama d Ssuq n Letniyen, Tirmitin d tɣiwant n At Zmenzer. Yella-d wass-agi n usileɣ d tmmla deg wayla n Mass Hassani Mohammed, d afellaḥ deg tɣiwant.

Yella-d usider n wass-agi n usileɣ d tummla sɣur Mass Kaci Boukhalfa, imḍebber n Srabes deg Tenmehla n tfellaḥt n Tizi Uzzu, daɣen d amussnaw deg uḥric n uzemmur d tfellaḥt. Ḥeḍren i leqdic-agi yimḍebbren n Srabes n tfellaḥt n Tizi Uzzu akked yimḍebbren n Srabes n tfellaḥt n Mɛatqa, ɣef uqerru-nssen Mass Meziani Hocine, Isdawiyen d yifellaḥen. Aṭas n tmussniwin timaynutin i lemden yifellaḥen deg tarrayin-agi n ufras n uzemmur, aya i wakken ad d-terr tzemmurt lɣella igerrzen u ad tegmu diɣ akken iwata lḥal.

Ali Zalouk